Ўзбекистон чемпионатида 23-тур ўйинлари бўлиб ўтмоқда.
Турнинг навбатдаги учрашуви Муборак шаҳрида бўлиб ўтди. Унда мезбонлар "Машъал" Намангандан ташриф буюрган "Навбаҳор" клубини қабул қилди. Ўйинда 0:0 ҳисобидаги нурсиз дуранг қайд этилди.
“Машъал”га қарши баҳсни одатий тарзда эҳтиёткорлик билан бошлаган “лочинлар” рақиб жамоа томонидан уюштирилган ҳужумларни тартибли ўйин эвазига бартараф этиб, имкон туғилган паллада олдинга интилишди. Таъкидлаш жоизки, дастлабки бўлимда муборакликлар Ўткир Юсупов қўриқлаган дарвозани асосан узоқ масофалардан нишонга олишга уринишди, лекин уларнинг ҳаракатларига аниқлик етишмади. Томонлар биринчи бўлимни голсиз якунлашди.
Иккинчи 45 дақиқаликда ўйин темпи бироз ошди, жамоалар ташкил этган ҳужумлар хавфи ҳам шунга яраша ортди. “Машъал”да захирадан майдонга тушган Годвин Оквара Чика 67-дақиқада қулай имкониятга эга бўлиб, дарвоза томон зарба йўллади, лекин Юсупов одатдагидек, фаоллик кўрсатиб, тўпни эгаллаб олди. 71-дақиқада эса, энди “лочинлар” сардори Азимжон Аҳмедовнинг кучли ва аниқ зарбаси йўлига муборакликлар посбони тўғаноқ бўлди.
Хуллас, учрашув чин маънода, тенг курашлар остида кечган бўлсада, футболчиларга дарвозаларни ишғол қилиш насиб этмади. Ҳакамнинг финал ҳуштаги чалинганидан кейин таблода порлаб турган 0:0 ҳисоби томонларнинг ўз жамғармаларига бир очкодан қўшиб қўйишларини англатарди.
Мазкур дурангдан сўнг “Навбаҳор” очколарини 33 тага етказиб, қўшимча кўрсаткичларга кўра, турнир жадвалида “Локомотив”дан ўзиб, 6-ўринга жойлашди.
Coca Cola Суперлига. 23-тур
23 октябрь (шанба)
“Машъал” – “Навбаҳор” – 0:0
Муборак. Баҳром Вафоев номидаги стадион. 325 томошабин
Ҳакамлар: Раҳимбек Каримов, Бектурсин Канназаров, Жалғасбай Сарсенов, Шуҳрат Ражабов.
“Машъал”: 35.Достонбек Тўхтабоев,2. Зафарбек Акрамов (77.Иброҳим Нўъмонов, 64), 5.Нажмиддин Нормуродов, 9.Ойбек Нурматов (97.Руслан Ҳожиев, 74), 11.Самуэль Онониву Чигози, 13.Шаҳзод Шайманов (15.Муҳаммадали Алиқулов, 74), 17.Жамолиддин Убайдуллаев, 22.Сирожиддин Қўзиев, 23.Самандар Шукуруллаев, 27.Муҳаммад Йўлдошев (19.Қаҳрамон Баҳодиров, 74), 99.Жаҳонгирбек Абдусаломов (10.Годвин Оквара Чика, 60).
“Навбаҳор”: 1.Ўткир Юсупов, 4.Боян Цигер, 7.Азимжон Аҳмедов (28.Илҳомжон Алижонов, 89), 9.Иван Соловьёв, 17.Эҳсони Паншанбе, 19. Мирзоҳид Ғофуров, 22.Игорь Голбан, 24.Давронбек Ҳошимов, 70.Аббосжон Ғуломов (8.Сардор Теляков, 74), 88.Боян Найденов, 95.Забиҳилло Ўринбоев (20.Иброҳим Ғанихонов, 66).
Огоҳлантиришлар: Шаҳзод Шайманов (23), Зафарбек Акрамов (44), Годвин Оквара Чика (90+1) – Давронбек Ҳошимов (66).
Четлатиш: Давронбек Ҳошимов (90+3, иккинчи сариқ, "Навбаҳор").
