O‘zbekiston chempionatida 23-tur o‘yinlari bo‘lib o‘tmoqda.
Turning navbatdagi uchrashuvi Muborak shahrida bo‘lib o‘tdi. Unda mezbonlar "Mash’al" Namangandan tashrif buyurgan "Navbahor" klubini qabul qildi. O‘yinda 0:0 hisobidagi nursiz durang qayd etildi.
“Mash’al”ga qarshi bahsni odatiy tarzda ehtiyotkorlik bilan boshlagan “lochinlar” raqib jamoa tomonidan uyushtirilgan hujumlarni tartibli o‘yin evaziga bartaraf etib, imkon tug‘ilgan pallada oldinga intilishdi. Ta’kidlash joizki, dastlabki bo‘limda muborakliklar O‘tkir Yusupov qo‘riqlagan darvozani asosan uzoq masofalardan nishonga olishga urinishdi, lekin ularning harakatlariga aniqlik yetishmadi. Tomonlar birinchi bo‘limni golsiz yakunlashdi.
Ikkinchi 45 daqiqalikda o‘yin tempi biroz oshdi, jamoalar tashkil etgan hujumlar xavfi ham shunga yarasha ortdi. “Mash’al”da zaxiradan maydonga tushgan Godvin Okvara Chika 67-daqiqada qulay imkoniyatga ega bo‘lib, darvoza tomon zarba yo‘lladi, lekin Yusupov odatdagidek, faollik ko‘rsatib, to‘pni egallab oldi. 71-daqiqada esa, endi “lochinlar” sardori Azimjon Ahmedovning kuchli va aniq zarbasi yo‘liga muborakliklar posboni to‘g‘anoq bo‘ldi.
Xullas, uchrashuv chin ma’noda, teng kurashlar ostida kechgan bo‘lsada, futbolchilarga darvozalarni ishg‘ol qilish nasib etmadi. Hakamning final hushtagi chalinganidan keyin tabloda porlab turgan 0:0 hisobi tomonlarning o‘z jamg‘armalariga bir ochkodan qo‘shib qo‘yishlarini anglatardi.
Mazkur durangdan so‘ng “Navbahor” ochkolarini 33 taga yetkazib, qo‘shimcha ko‘rsatkichlarga ko‘ra, turnir jadvalida “Lokomotiv”dan o‘zib, 6-o‘ringa joylashdi.
Coca Cola Superliga. 23-tur
23 oktyabr (shanba)
“Mash’al” – “Navbahor” – 0:0
Muborak. Bahrom Vafoyev nomidagi stadion. 325 tomoshabin
Hakamlar: Rahimbek Karimov, Bektursin Kannazarov, Jalg‘asbay Sarsenov, Shuhrat Rajabov.
“Mash’al”: 35.Dostonbek To‘xtaboyev,2. Zafarbek Akramov (77.Ibrohim No‘’monov, 64), 5.Najmiddin Normurodov, 9.Oybek Nurmatov (97.Ruslan Hojiyev, 74), 11.Samuel Ononivu Chigozi, 13.SHahzod Shaymanov (15.Muhammadali Aliqulov, 74), 17.Jamoliddin Ubaydullayev, 22.Sirojiddin Qo‘ziyev, 23.Samandar Shukurullayev, 27.Muhammad Yo‘ldoshev (19.Qahramon Bahodirov, 74), 99.Jahongirbek Abdusalomov (10.Godvin Okvara Chika, 60).
“Navbahor”: 1.O‘tkir Yusupov, 4.Boyan Siger, 7.Azimjon Ahmedov (28.Ilhomjon Alijonov, 89), 9.Ivan Solovyov, 17.Ehsoni Panshanbe, 19. Mirzohid G‘ofurov, 22.Igor Golban, 24.Davronbek Hoshimov, 70.Abbosjon G‘ulomov (8.Sardor Telyakov, 74), 88.Boyan Naydenov, 95.Zabihillo O‘rinboyev (20.Ibrohim G‘anixonov, 66).
Ogohlantirishlar: Shahzod Shaymanov (23), Zafarbek Akramov (44), Godvin Okvara Chika (90+1) – Davronbek Hoshimov (66).
Chetlatish: Davronbek Hoshimov (90+3, ikkinchi sariq, "Navbahor").
