Ҳеч кимга сир эмаски, ҳозирда «Барселона» ёрқин келажакка умид билан яшамоқда. Бугунги кундаги жамоанинг ўйинлари биз хоҳлагандек ёрқин бўлмаслиги мумкин, лекин Фати, Педри ва Гави каталонияликларни қутқариб, эртанги кунги кучли «Барса»ни шакллантиришлари керак. Stadion.uz ўз ўқувчилари эътиборини «Реал Мадрид»да ҳам футболда келажаги буюк бўлиши башорат қилинган бир гуруҳ ёшлар борлигига қаратади.
Ўзини амалда кўрсатаётганлар
Винисиус Жуниор (Бразилия, 21 ёш)
Келинг, бир қаторда 23 ёшли Эдер Милитао ва Федерико Валвердени ҳам эслатиб ўтамиз. Ҳали ёш, аммо жамоада керакли фазилатлар ва ролларга эга бўлган етук футболчилар. Кўзга яққол ташланадиган истиқболли йигитлар «армия»wини Винисиус Жуниор очиб беради. У Карло Анчелотти бошқарувида ўз устида яхши ишлашни бошлади ва асосий таркибдаги ўз ўрнини аниқ қилиб қўйишга улгурди. Бразилиялик «Қироллик клуби» учун 100 дан ортиқ ўйин ўтказган ва бу мавсум унинг фаолиятидаги энг яхшиси бўлиши керак. Бу мавсумда у «Реал» таркибида 11 ўйинда7 гол урган ва 5 марта шерикларига ассистентлик қилди. Ва у бундан ҳам яхшироқ ўйин кўрсата оладиганга ўхшайди.
Родриго (Бразилия, 20 ёш)
Родриго балки Винисиусдек ёрқин ва иқтидорли эмасдир, қайсидир маънода ҳали потенциали тўлиқ очилмаган ёш футболчи. Родриго аллақачон «Реал Мадрид» учун фойдали ўйинларни ўтказишни бошлади, айниқса бразилиялик Чемпионлар лигасида яхши ўйнайди, у ерда «Галатасарой»га қарши ўйинда хет-трик қилган ва «Интер»га қарши ўйинларда икки марта ғалаба келтирган голларни киритган. Родриго кўп нарсани қодир, лекин юқорида айтиб ўтганимиздек у ўзини тўлиқ намоён қилишга улгурмади. У бор-йўғи 20 ёшда, Родригода барқарорликка эришиш учун ҳали етарлича фурсат топилади.
Эдуардо Камавинга (Франция, 18 ёш)
Август ойида француз вундеркинди «Ренн»дан «Реал»га 31 миллион евро эвазига ўтди ва «Қироллик клуби»даги дебютини майдонга тушганидан 6 дақиқа ўтиб гол билан нишонлади. Ёш бўлишига қарамай, Камавинга аллақачон танилишга улгурган. У Франция терма жамоаси асосий таркибидаги ўйинларда майдонга тушишга улгурди. Камавинга «қаймоқранглилар» таржибида ярим ҳимояда Лука Модрич ёки Тони Крооснинг муносиб давомчиси бўлиши керак. Карло Анчелотти французни нафақат техник ва жисмоний қобилиятлари учун, балки характери ва ақл-заковати учун ҳам мақтайди, бу эса Эдуардонинг сайёрадаги энг буюк клублардан бирида катта персона бўлиб шаклланишига ёрдам бериши керак.
Порлаши кутилаётганлар
Антонио Бланко (Испания, 21 ёш)
Ярим ҳимоячи Зинедин Зиданда яхши таассурот қолдирган ва ўтган мавсумда «Реал Мадрид»даги дебютини ўтказди. Антонио камдан-кам учрайдиган ярим ҳимоячилар туркумидан: у тўпни ўзида яхши олиб юради ва ўз жамоасининг ярим ҳимоясини бошқаришни билади, тезликни белгилайди ва ҳужумларнинг ривожланиш йўналишини танлайди. Бланко жисмоний ҳаракатлардан кўра кўпроқ техника ва футбол тафаккурига таянади ва бундай футболчиларнинг катталар футболида ўзини намоён қилишлари учун бироз кўпроқ вақт талаб қилиниши одатий ҳол.
Марвин Парк (Испания, 21 ёш)
«Кастиля»нинг ушбу кашфиёти Зиданнинг ҳам эътиборини тортган ва Анчелотти буни ҳозирча эътиборсиз қолдираётган бўлсада, Марвин «Реал Мадрид»да барибир ўз имкониятини қўлга киритиши керак. Маллоркада туғилган нигериялик отанинг ва жанубий кореялик онанинг фарзанди ўзининг кўп қирралилиги билан машҳур: Марвин ҳар қандай қанот позициясида, ҳужумда ёки ҳимояда ўйнаши мумкин. У яхши тезликка эга, бу рақобатбардош устунликдир ва Марвиннинг мураббийлари йигитнинг меҳнатсеварлигини қайд этишган.
Мигель Гутиеррес (Испания, 20 ёш)
Гутиеррес кўп вақтдан бери муаммоли ҳисобланган чап қанот ҳимоячиси позициясига даъво қилмоқда, гарчи Ферлан Менди ва Марсело тузалиб кетган бўлсада, унга ўйин дақиқаларини мураббий ажратиб бериши керак.
Мигель аллақачон асосий жамоа учун яхши ўйинлар ва голли узатмаларга эга ва кейинги мавсумда муваффақиятга эришиши кутилмоқда. Чунки Марсело жамоада ўзининг сўнгги мавсумини ўтказаётган бўлиши мумкин. 20 ёшли Гутиеррес Испания ёшлар терма жамоасининг асосий ўйинчисидир ва эртами-кечми ўз имкониятини топади.
Серхио Сантос (Испания, 20 ёш)
Бу йигит янги Начога айланиши мумкин, чунки у ҳимоянинг исталган позициясида ҳам ўйнай олади, бу мавсумда у вақти-вақти билан майдонга тушди: «Малёрка»га қарши ўйинда (6:1) 11 дақиқа ўйнади ва якунда Лукас Васкесни алмаштирди. Серхио Сантос ўзини ҳимояда ўнг томонда кўради ва уни Карвахалнинг вориси деб аташга ҳали эрта бўлсада, умидли ҳимоячи аллақачон кучли жисмоний ҳолатга эга. Баъзида бу муваффақиятли ҳимоячи бўлиш учун етарли жиҳатдир.
Серхио Аррибас (Испания, 20 ёш)
Ўтган мавсумда Зидан испаниялик футболчини 8 марта майдонга туширди ва эпчил вингер унга ажратилган дақиқаларда жуда дадил ҳаракат қилди. Серхио мавсум олди ўйинларида ўзини яхши кўрсатди, лекин расмий учрашувларда Анчелотти уни ҳали майдонга қўйиб туширмади. Серхио тезкор, жисмоний бақувват, чап оёқ футболчи «Реал» учун қизиқарли ҳужум варианти бўлиши мумкин, чунки у ўнгдан чап қанотга яхши мослашиши билан ажралиб туради.
Сўнгги сўз ўрнида
«Реал»нинг таркибида бир қатор ёши катта футболчилар борлигини билар эдингиз. Бугун сиз Мадриднинг истиқболли футболчилари билан танишдингиз.
Футболни севинг! Зеро у барчамизни бирлаштириш қобилятига эга!
Руслан Максимов тайёрлади.
