Франция терма жамоасининг собиқ етакчиси Зинедин Зидан бутун футболчилик фаолияти давомида фақат битта нарсадан қаттиқ афсусда бўлганини тан олди. Собиқ футболчи ҳеч қачон ўз она шаҳри клуби "Марсель" жамоасида ўйнамаганидан хафа.
"Ёшлигимда Марселни тарк этганман. Футболчи бўлганим учун у ерда кўп яшай олмаганман. Вақти-вақти билан шаҳарга ташриф буюриб тураман. 15, 16 ёки 17 ёшимда тез-тез "Марсель" ўйинларини кўргани борардим ва ҳар доим ўзимга шундай дер эдим: бир кун келиб шу ерда ўйнайман. Лекин охир-оқибат, турли сабабларга кўра, менда ҳеч қачон бундай имконият бўлмади. Бу футболдаги энг катта армоним", - деди Зидан La Provence нашрига берган интервьюсида.
Эслатиб ўтамиз, Зидан ФИФА томонидан уч карра йилнинг энг яхши футболчиси (1998, 2000, 2003) деб топилган.
