Fransiya terma jamoasining sobiq yetakchisi Zinedin Zidan butun futbolchilik faoliyati davomida faqat bitta narsadan qattiq afsusda bo‘lganini tan oldi. Sobiq futbolchi hech qachon o‘z ona shahri klubi "Marsel" jamoasida o‘ynamaganidan xafa.
"Yoshligimda Marselni tark etganman. Futbolchi bo‘lganim uchun u yerda ko‘p yashay olmaganman. Vaqti-vaqti bilan shaharga tashrif buyurib turaman. 15, 16 yoki 17 yoshimda tez-tez "Marsel" o‘yinlarini ko‘rgani borardim va har doim o‘zimga shunday der edim: bir kun kelib shu yerda o‘ynayman. Lekin oxir-oqibat, turli sabablarga ko‘ra, menda hech qachon bunday imkoniyat bo‘lmadi. Bu futboldagi eng katta armonim", - dedi Zidan La Provence nashriga bergan intervyusida.
Eslatib o‘tamiz, Zidan FIFA tomonidan uch karra yilning eng yaxshi futbolchisi (1998, 2000, 2003) deb topilgan.
