ЖЧ-2022 саралаши доирасидаги Австралия - Саудия Арабистони ўйинини шарҳлар эканман, бир савол ялт этиб ўтди миямдан: бизникилар шунақа ўйнаганми ҳеч? Бир пайтлар Қосимов, Мақсудов, Лебедев, Ширшов кабиларда шунақа важоҳат бормиди? Улар шунақа курашувчан бўлганларми? Бугунгилар орасида Элдор бекорга Италияда, Иброҳимхалил бекорга Россияда юрмагандир? Жалол Осиёнинг энг яхшиларидан бири экани бекормасдир?

Афсуски, жамоа сифатида бир яхлит бўлиб, тажовузкор, керак жойида айёр, керак жойида жамоадошимиз учун туриб бериб, лозим топилса рақибга ташланиб, яхлит, бир бутун механизм бўлиб ўйнаганимизни эслолмадим. Эҳтимол, сиз Қатар-2011, Хиросима-1994 ва бошқа мусобақаларни эслатарсиз? Балки Боб Хафтон, Убиража Вега да Сильва, Юрген Гёде, Маҳмуд Раҳимов, Рауф Инилеев ва бошқа мураббийлар қўл остидаги айрим ўйинларни эсларсиз? Алалхусус, хотирангизда Баҳрайн, БАА ёки Японияга қарши ўйнаган зўр ўйинларимиз бордир?

Мен ҳаммасига қўшиламан, ҳаммасидан хабарим бор, эътирозларингиз бўлса, унга ҳам қўшилавераман, аммо...

Ҳеч қачон (!!!) ОФК грандлари бўлмиш Саудия, Эрон, Австралия, Жанубий Корея ва Япония каби ўй-на-ма-ган-миз! Ҳа, зўр ўйнаганмиз, аммо юқоридагилар каби доимий равишда бир оила, якдил ҳамфикр, ҳаммаслак, дўст, биродар бўлиб, бир-бирига туриб бериб, бирга разведкага борадиган бўлиб ўйнамаганмиз. Ҳеч қачон!

Миллий жамоамиз таркибида доим зўрлар бўлган, аммо оила бўлмаган. Микрофон қаршисида гапириладиган ясама гапларга эса ишонмайман. Майли, улар ҳаётда дўст бўлмасин, оилавий борди-келди қилмасин, буни ҳеч ким сўрамаяпти ва бунинг кераги ҳам йўқ. Шева ва Ребров бир-бири билан гаплашмаган ҳатто (масалан-да), лекин бу уларга Киевда ҳам, миллий жамоада ҳам супертандем бўлишига тўсқинлик қилмаган. Қисқаси, бир мақсад учун, бир-бирини ёқтирмаса ҳам, жанг қилиш керак. Майдон ташқарисида нима қилсанг қил-у, майдон ичида бир сафдаги бир мақсадга интилувчан ЖАМОА бўл. Иложи йўқми?

Унда билмадим. ЖЧга чиқишдан олдин бирдам бўлишни ўрганволайлик, хўпми?!

Бобур Акмалов.