JCH-2022 saralashi doirasidagi Avstraliya - Saudiya Arabistoni o‘yinini sharhlar ekanman, bir savol yalt etib o‘tdi miyamdan: biznikilar shunaqa o‘ynaganmi hech? Bir paytlar Qosimov, Maqsudov, Lebedev, Shirshov kabilarda shunaqa vajohat bormidi? Ular shunaqa kurashuvchan bo‘lganlarmi? Bugungilar orasida Eldor bekorga Italiyada, Ibrohimxalil bekorga Rossiyada yurmagandir? Jalol Osiyoning eng yaxshilaridan biri ekani bekormasdir?

Afsuski, jamoa sifatida bir yaxlit bo‘lib, tajovuzkor, kerak joyida ayyor, kerak joyida jamoadoshimiz uchun turib berib, lozim topilsa raqibga tashlanib, yaxlit, bir butun mexanizm bo‘lib o‘ynaganimizni eslolmadim. Ehtimol, siz Qatar-2011, Xirosima-1994 va boshqa musobaqalarni eslatarsiz? Balki Bob Xafton, Ubiraja Vega da Silva, Yurgen Gyode, Mahmud Rahimov, Rauf Inileev va boshqa murabbiylar qo‘l ostidagi ayrim o‘yinlarni eslarsiz? Alalxusus, xotirangizda Bahrayn, BAA yoki Yaponiyaga qarshi o‘ynagan zo‘r o‘yinlarimiz bordir?

Men hammasiga qo‘shilaman, hammasidan xabarim bor, e’tirozlaringiz bo‘lsa, unga ham qo‘shilaveraman, ammo...

Hech qachon (!!!) OFK grandlari bo‘lmish Saudiya, Eron, Avstraliya, Janubiy Koreya va Yaponiya kabi o‘y-na-ma-gan-miz! Ha, zo‘r o‘ynaganmiz, ammo yuqoridagilar kabi doimiy ravishda bir oila, yakdil hamfikr, hammaslak, do‘st, birodar bo‘lib, bir-biriga turib berib, birga razvedkaga boradigan bo‘lib o‘ynamaganmiz. Hech qachon!

Milliy jamoamiz tarkibida doim zo‘rlar bo‘lgan, ammo oila bo‘lmagan. Mikrofon qarshisida gapiriladigan yasama gaplarga esa ishonmayman. Mayli, ular hayotda do‘st bo‘lmasin, oilaviy bordi-keldi qilmasin, buni hech kim so‘ramayapti va buning keragi ham yo‘q. Sheva va Rebrov bir-biri bilan gaplashmagan hatto (masalan-da), lekin bu ularga Kiyevda ham, milliy jamoada ham supertandem bo‘lishiga to‘sqinlik qilmagan. Qisqasi, bir maqsad uchun, bir-birini yoqtirmasa ham, jang qilish kerak. Maydon tashqarisida nima qilsang qil-u, maydon ichida bir safdagi bir maqsadga intiluvchan JAMOA bo‘l. Iloji yo‘qmi?

Unda bilmadim. JCHga chiqishdan oldin birdam bo‘lishni o‘rganvolaylik, xo‘pmi?!

Bobur Akmalov.