ЖЧ-2014 саралаш сўнгги босқичи ўйинлари бошланадиган июнь ойигача Европада тўп сурадиган футболчилардан фойдалана олмайдиган Япония терма жамоаси бош мураббийи Альберто Дзаккерони бу вақтдаги бор эътиборини Жей-лигадаги салоҳиятли иқтидорларни излаш учун сарфлайди. Бу ҳақда «Goal.com» интернет-нашри хабар бермоқда.

Италиялик мутахассис ўтган мавсум Хироки Сакаи ва Майк Хэвинаар каби футболчиларнинг клублардаги ўйинларини бевосита кузатиш учун тез-тез стадионларнинг матбуот ложасида пайдо бўларди. Афтидан, у ушбу мавсумда ҳам бу одатидан воз кечмайди.

«Жей-лига — терма жамоа учун ўйинчиларни етказиб берадиган энг катта манбадир. Мен, энг аввало, терма жамоанинг ҳозирги аъзолари ўйинчи сифатида қандай ўсаётганликларини кузатиш мақсадидаман. Агар улар мен кутган ўйинни намойиш эта олмаётган бўлишса, уларнинг ўрнига – у ёш бўладими ёки фахрий, бундан қатъий назар – доим янги ўйинчи тайёр туради. Жей-лига бунчалик кўп ёшларга ўйнаш имконини бериш бўйича жаҳонда етакчи чемпионат ҳисобланади», деди Япония терма жамоаси бош мураббийи.

«Жей-лига жамоалари техник жиҳатдан анча ривожланган, бироқ тажовузкорлик, шижоат борасида бу ердаги жамоалар Европа ёки Яқин Шарқ лигаларидагидан ортда қолишади. Футболчилар, дарвоза томон ўрта масофалар орқали зарба беришдан кўра, тўпни жарима майдончасига узатишга кўпроқ ҳаракат қилишади. Балки бу Бразилия футболининг таъсиридир», деди италиялик мутахассис.

Япония Жей-лигасидаги аксарият ўйинлар шанба кунига тўғри келиб қолганига ишора қилиб, 18та клуб иштирок этадиган лиганинг имкон қадар барча ўйинларини кўриш мақсадида бўлган 58 ёшли мураббий шундай деб ҳазиллашди: «Тақвим мени тўққиз бўлакка бўлиб ташлаш учун шундай тузилган (кулади). Ҳар бир ўйинда қандайдир кашфиёт бўлади».

Эслатиб ўтамиз, Япония терма жамоаси, Ўзбекистон каби, ЖЧ-2014 саралаш Осиё минтақаси 4-босқич йўлланмасини қўлга киритиб бўлган. 4-саралаш босқичига қуръа ташлаш маросими 9 март, жума куни бўлиб ўтади.