8 декабрь куни Чемпионлар лигаси гуруҳ босқичи 6-туридан ўрин олган «Бавария» ҳамда «Барселона» ўртасидаги учрашув бўш трибуналар билан ўтказилади. Бу ҳақда Каталония клуби расмий сайти хабар берди.
Ўйинни томошабинларсиз ўтказиш тўғрисидаги қарор вилоятдаги эпидемиологик вазият ёмонлашгани сабабли қабул қилинган.
Маълумот ўрнида, «Бавария» аллақачон Чемпионлар лигаси 1/8 финалига йўлланмани қўлга киритган ва «Барселона» «Бенфика» билан ушбу квартетдан иккинчи йўлланма учун курашади. Айни дамда каталонияликларда 7 очко, лиссабонларда эса 5 очко бор.
Эслатиб ўтамиз, биринчи турда «Бавария» «Камп Ноу»да «Барселона»ни 3:0 ҳисобида мағлуб этганди.
