Футзал бўйича Ўзбекистон миллий жамоаси дарвозабони ва сардори Рустам Умаров Қозоғистонга қарши бўлиб ўтган иккинчи ўртоқлик учрашуви борасида (6:4) «Qazsport» телеканалига берган интервьюсида ўз фикрини билдириб ўтди.

"Кеча ва бугун иккита қизиқарли учрашув бўлди. Дастлабки ўйинда ҳам вазиятларга эга бўлгандик, аммо улардан фойдалана олмагандик. Агар улардан фойдаланганимизда, ҳисоб ҳам, ўйин ҳам бошқача бўларди. Бугунги баҳснинг дастлабки дақиқаларида майдонга қандайдир "ухлаган" ҳолда чиқдик ва 3та гол ўтказиб юбордик. Танаффус пайтида кийим алмаштириш хонасида мураббий билан жиддий суҳбат кечди. Иккинчи бўлимда қандай ҳаракат қилганимизни кўрдингиз. Дарвозабон ярим жамоа эканини биласиз. Игита захирага олинганидан кейин Қозоғистоннинг ўйини бузилиб қолди. Биз бундан фойдаланиб 5та гол урдик. Ўйин сўнгида эса Игита майдонга қайтди ва кўпгина хавфли вазиятлар яратди. Йигитларга раҳмат: улар сабр билан ўйнашди ва ҳисобни ушлаб қолишди. Кеча ютқазган бўлсак, бугун ғалаба қозондик. Умумий ҳисоб — 1:1. Биз ҳар икки баҳсда муносиб ўйин намойиш этдик", — деди Умаров.