Futzal bo‘yicha O‘zbekiston milliy jamoasi darvozaboni va sardori Rustam Umarov Qozog‘istonga qarshi bo‘lib o‘tgan ikkinchi o‘rtoqlik uchrashuvi borasida (6:4) «Qazsport» telekanaliga bergan intervyusida o‘z fikrini bildirib o‘tdi.

"Kecha va bugun ikkita qiziqarli uchrashuv bo‘ldi. Dastlabki o‘yinda ham vaziyatlarga ega bo‘lgandik, ammo ulardan foydalana olmagandik. Agar ulardan foydalanganimizda, hisob ham, o‘yin ham boshqacha bo‘lardi. Bugungi bahsning dastlabki daqiqalarida maydonga qandaydir "uxlagan" holda chiqdik va 3ta gol o‘tkazib yubordik. Tanaffus paytida kiyim almashtirish xonasida murabbiy bilan jiddiy suhbat kechdi. Ikkinchi bo‘limda qanday harakat qilganimizni ko‘rdingiz. Darvozabon yarim jamoa ekanini bilasiz. Igita zaxiraga olinganidan keyin Qozog‘istonning o‘yini buzilib qoldi. Biz bundan foydalanib 5ta gol urdik. O‘yin so‘ngida esa Igita maydonga qaytdi va ko‘pgina xavfli vaziyatlar yaratdi. Yigitlarga rahmat: ular sabr bilan o‘ynashdi va hisobni ushlab qolishdi. Kecha yutqazgan bo‘lsak, bugun g‘alaba qozondik. Umumiy hisob — 1:1. Biz har ikki bahsda munosib o‘yin namoyish etdik", — dedi Umarov.