Мадриднинг “Атлетико” клуби ҳимоячи Киран Триппьер бўйича таклифларни январь ойидаги трансфер ойнасида кўриб чиқишга тайёр. ESPN хабарига кўра, “матрасчилар” футболчи учун товон пули миқдори ҳақида қарор қабул қилишган.
Испания клуби Триппьер учун камида 22 миллион евро таклиф қилинса, уни сотишга тайёр. Киран хизматларига “Манчестер Юнайтед”, “Ньюкасл” ва Лондоннинг “Тоттенхэм” клублари қизиқиш билдирмоқда.
Англиялик футболчининг “Атлетико” билан шартномаси 2023 йилнинг ёзига қадар амал қилади. Трансфермаркт портали экспертлари унинг нархини 20 миллион еврога баҳоламоқда.
Ҳимоячи жорий мавсумда Ла Лигада 14 та ўйин ўтказди.
