Лондоннинг "Арсенал" клуби бош мураббийи Микель Артетанинг ёрдамчиси Альберт Стейвенберг "Манчестер Сити"га қарши бўлиб ўтган ўйиндан кейинги фикрлари билан ўртоқлашди. Артета коронавирусга чалинганлиги сабабли, ушбу баҳсни ўтказиб юборди.

«Жуда ғазабдамиз. Дунёнинг энг яхши жамоаларидан бирига қарши бундай ўйнаш - ғазаблантиради. Биз учрашувда ғалаба қознишимиз керак эди, лекин якунда мағлуб бўлдик.

Эдегор билан бўлган вазиятда пенальти? Менинг фикримча, ўша вазиятда пенальти бор эди, лекин мен изчилликни хоҳлайман. Бизда ВАР бор, лекин ҳеч ким нега ҳакамларни текширмаяпти?

Рақиб нима учун кўплаб вазиятларни яратди? Якунда уларнинг омади чопди. Кўрсатган ўйинимиз мухлисларга ёқди деб ўйлайман. Ҳисоб 1:1 бўлиб турган пайтда Мартинелли жуда қулай вазиятга эга бўлганди. Ҳисоб биз ўйлагандек бўлмади, лекин кўрсатган ўйинимиз билан фахрланамиз.

Габриэлнинг четлатилиши? Баъзан ўрганишингиз керак бўлади. Таркибимизда жуда кўплаб ёш футболчилар бор, улар ўз эҳтиросларини жиловлай олишлари керак. Қолаверса, у биринчи сариқ карточкага лойиқ эмасди. Ҳозир бу вазиятни ҳакамдан сўрай олмайман. Лекин, сариқ карточкаси бор футболчи ақл билан ўйнаши керак.

Бугун кўплаб ижобий вазиятларни яратдик. Бу биз кўрсатишимиз керак бўлган ўйин», – деди Стейвенберг.