Ўзбекистон олимпия терма жамоаси бош мураббийи Вадим Абрамов Сурия устидан қозонилган ғалаба учун шогирдларига миннатдорчилик билдирди, айни вақтда, Уммонга қарши осон бўлмаган баҳс кутиб турганини ҳам қўшимча қилди.
«Албатта, ғалаба қозониш ҳар доим ҳам яхши. Шогирдлар мураккаб бир вазиятдан чиқиб кета олганликлари учун уларга миннатдорчилик билдираман. Аммо хотиржамликка берилишга ҳали эрта. Бизни олдинда Уммонга қарши яна бир принципиал ва осон бўлмаган ўйин кутиб турибди. Биз бугун кўп хатоларга йўл қўйдик. Сурия билан ўйиндаги камчиликларни таҳлил қилиб чиқиб, Уммонга қарши ўз футболимизни намойиш этиш устида ишлаш учун бизда икки кун вақт бор», - деди ўзбекистонликлар устози.
«Нимагалигини билмайман, бироқ, Ироқ олимпиячиларидан учралган мағлубиятдан сўнг шогирдларим аввал кўрсатган ўйинларини намойиш эта олишмаяпти. Умид қиламанки, Уммонга қарши ўйинда нимага қодир эканлигимизни кўрсатиб қўя оламиз», - дея қўшимча қилди Ўзбекистон олимпия терма жамоаси бош мураббийи Вадим Абрамов.
