"Sky Sports Italia" хабарига кўра, "Ювентус" ҳужумчи Пауло Дибалага йилига 8 миллион + 2 миллион евро бонус оладиган янги шартнома бўйича таклифини бекор қилишга қарор қилди.

Манбанинг хабарига кўра, Турин клуби футболчининг маошини камайтирмоқчи. Клуб қишки трансфер ойнаси ёпилгунига қадар унга бундан ҳам фойдали таклифлар тушмаслигига ишонч билдирмоқда.

Хабар қилинишича, аргентиналик футболчига "Тоттенхэм", "Барселона", "Атлетико" ва "Интер" клублари қизиқмоқда.

28 ёшли Дибала жорий мавсум “Ювентус” сафида 20 ўйинда майдонга тушиб, 9 та гол урди ва 4 та голли узатмани амалга оширди. Ҳужумчининг Турин клуби билан шартномаси 2022 йилнинг 30 июнига қадар мўлжалланган. Трансфермаркт портали аргентиналик футболчини 50 миллион еврога баҳоламоқда.