Ўзбекистон футбол ассоциацияси вице-президенти Одил Аҳмедов U-21 Ўзбекистон чемпионати ўйинларини асосий жамоа баҳсларидан бир кун кейин ўтказиш борасида ўз фикрини билдириб ўтди.

"Ўйлашимча, U-21 чемпионати доирасидаги ўйинларни асосий таркиб иштирокидаги учрашувлардан бир кун кейин ўтказишнинг фойдали томонлари жуда кўп. Ҳозир улардан учтасини санаб бераман.

Биринчидан, жамоанинг асосий таркибидан жой ололмаган футболчи эртасига U-21 чемпионатида ўйнаши мумкин. Бу умидли футболчилар ўйин амалиётисиз қолиб кетишининг олдини олади.

Иккинчидан, агар клубнинг U-21 жамоаси учун ажратилган майдон талаб даражасида бўлмаса, учрашув асосий стадионда ўтказилади.

Учинчидан, асосий таркиб мураббийлари энди бемалол U-21 чемпионати ўйинларини кузатишлари мумкин. Бунга қадар U-21 чемпионати учрашувлари асосий таркиб машғулотлари билан бир пайтга тўғри келиши кўпчиликка ноқулай эди", — деди Одил Аҳмедов.