"Ювентус"нинг "Зенит" ҳужумчиси Сердар Азмуннинг трансфери борасидаги музокаралари тўхтаб қолди, деб хабар беради "Tuttosport".
Манбага кўра, Россия клуби 27 ёшли эронлик учун ҳамон 5 миллион евро талаб қилмоқда, Италия клуби эса бундай шартларга рози эмас. Аввалроқ, 17 январь куни “Ювентус” футболчи учун 1 миллион евро тўлашга тайёрлиги ва 2 миллион евролик эҳтимолий тўловларни шартномага бонус сифатида киритиши ҳақида хабар берилганди.
2021/22 йилги мавсумда Азмун "Зенит" сафида 21 та ўйинда майдонга тушиб, 10 та гол ва 4 та голли узатмани амалга оширган. Футболчининг Россия клуби билан шартномаси 2022 йилнинг июнь ойи охиригача амал қилади.
