Ўзбекистон олимпия терма жамоаси бош мураббийи Вадим Абрамов Уммон терма жамоасига қарши ўйиндан сўнг ўз фикрлари билан ўртоқлашар экан, рақиб ҳақли равишда ғалаба қозонганини таъкидлаб ўтди.
«Ҳаддан ташқари кўп хатога йўл қўйганимиз кейинги босқич йўлланмасини қўлга киритишимизга имкон бермади. Қайд этилган натижадан афсусдаман, бироқ бугун Уммон биздан кўра яхшироқ ҳаракат қилди ва ҳақли равишда ғалаба қозонди», деди Абрамов.
«Жамоага нима бўлганини мен билмайман, лекин у сўнгги ўйинларни жуда ҳам ёмон ўтказди. Ҳаммаси ўша Ироқ билан бўлган муваффақиятсиз ўйиндан бошланган эди. Шундан сўнг биз ўзимиз хоҳлаган натижага эриша олмадик», деди ўзбекистонликлар устози.
«Сурияга қарши ўйиндан сўнг биз таркибни янгиладик ва ҳаммаси режамиздагидек кетаётган эди. Бироқ пенальтидан урилган тезкор гол ўйин манзарасини тубдан ўзгартириб юборди», дея қўшимча қилди Ўзбекистон олимпия терма жамоаси бош мураббийи Вадим Абрамов.
