Камтарин ва уятчан бўлиб улғайган Жуд Беллингем футбол экспертларида нечоғли ёрқин таассурот қолдирган бўлса, мухлисларини ҳам худди шундай лол қолдирди. Мидлендсдан Вестфалияга кўчиб ўтгач, таълим учун энг зўр жойни танлади. Дортмунд «Боруссия»сидаги дастлабки фантастик 18 ойи-дан сўнг, 18 ёшли футболчи шундай деди: «Боруссия» ўзим ва янада ривожланишим учун энг мақбул клуб. Ҳатто шундай дейишим мумкин: мен учун дунёда бундан яхши клуб йўқ!»
Айрим ҳоллардагина унинг ҳали 18 ёшда эканлигини пайқаш мумкин. Мисол учун, октябрь ойи охирида дунёнинг энг чиройли стадионида «Кёльн» дарвозасига гол урган эпизодни эсланг. Жарима майдони ўнг бурчагида тўпни қабул қилган Жуд уни марказга шундай аниқ йўлладики, Торган Азарга шунчаки бошини бир силкитиб қўйиш қолганди, холос. Голни гишонлаш пайтида Беллингем бир лаҳза жамоадошларидан узоқлашди, қўлларини бир неча марта юқорига кўтарди ва томошабинларни яна қарсак чалишга чақирди, юзида унинг ёшига мос бебош табассум пайдо бўлди. Кейин у ортига ўгирилиб, байрамни давом эттирди.
«У ҳали ҳам менинг болажоним», - дейди ўғлидан беҳад фахрланадиган онаси Дениз Беллингем. Бу аёл Жуднинг икки ярим йил олдин бошланган Дортмунд саргузаштида ўғлига ҳамроҳлик қилган. «Фарзандим жуда қувноқ, шу билан бирга бироз аҳмоқона қилиқлари бўлиши мумкин ва у мени доим кулдиради». Бундеслигадаги биринчи йилидаёқ асосий таркиб ўйинчиси, Германия кубоги соҳиби, миллий терма жамоа ўйинчиси ва Европа чемпиони бўлишига яқин қолгани учун унда ўсмирлик гаштини суришга вақти бўлмаган ўсмир учун бу жуда қадрли эди. Айтганча, у Европа чемпионати финал босқичида иштирок этган тарихдаги энг ёш футболчи ҳисобланади. Ўтган йилнинг 13 июнь куни «Уэмбли» стадионида Англия термаси Хорватияни 1:0 ҳисобида мағлуб этган ўйинда Жуд 18 ёшга тўлишига ҳали 16 кун бор эди.
Дортмунд клуби вундеркинди билан боғлиқ воқеалардан яна бири «Бирмингем Сити» клуби Жуднинг «Сент-Эндрюс» стадионидаги меҳнатлари эвазига иккита нарсани таклиф қилгани билан боғлиқ. Биринчидан, унинг жамоадаги 22-рақами энди ҳеч кимга берилмайди, бу эса асосий жамоада бор-йўғи бир йил ўйнаган ва уни 17 ёшида тарк этган футболчи учун мутлақо кутилмаган ҳол. Иккинчидан, «Бирмингем Cити» YouTube каналида «Жуд Беллингемнинг юксалиши» номли ҳужжатли фильмни чиқарди. Худди шундай тарзда, Дортмунднинг «Боруссия»си ҳам Жуднинг фантастик йилини тасвирлаб берадиган киноасар тайёрлади ва у Sky каналида эфирга узатилади. Қуйида ушбу футболчи билан уюштирилган интервьюни эътиборингизга ҳавола қиламиз.
- Жуд, яқинда кузатилган шунча нотинчликлардан сўнг, футбол майдони сиз учун нимани англатади?
- Бу дунёда ўзимни жуда қулай ҳис қиладиган ягона жой бўлса керак. Бунинг учун кўп иш қилишим шарт эмас, менга футболнинг ўзи етарли. Тўп бўлса, кифоя, ўйнашга ҳаракат қиламан ва мен учун бу дунёдаги энг оддий нарса. Жамоадошларим доим ғалаба қозонишимиз учун бор кучимни сарфлаётганимни кўришади. Ўйинда мағлуб бўлсак, мен тасаввур қиладиган энг ёмон одамман. Лекин майдонда бўлмаган пайтимда, дам олишни ва Playstation ўйнашни яхши кўрадиган мутлақо оддий инсонман.
- 17 ёшидаёқ юлдузларга қарши ўйнаган ва трансфер нархи билан қизиқмайдиган мутлақо оддий йигит...
- Миқдорни аллақачон биламан, ўтган ёзда Дортмундга кўчиб ўтганимда бу ҳақда ҳамма жойда ёзишган. Ва шуни айтишим мумкинки, бу жуда ажойиб эди! Яна ким ёш йигитга шунча пул сарфлаяпти, ҳатто коронавирус пандемияси даврида ҳам? Мен Дортмунднинг катта клуб эканлигини билардим, лекин бундай улкан ва фантастик стадионда илк селфимни олганимдагина, жамоанинг қанчалик катта эканлигини англадим.
- Дортмунддаги илк ҳафталарингизни шу қадар ишончли ўтказдингизки, гўё доим шу ерда ўйнагандексиз...
- Ҳа, майдонда қанчадан-қанча буюк футболчилар билан ўйнадим. Матс Хуммельс ёки Марко Ройс каби етакчилардан кўп нарсаларни ўрганиш мумкин. «Боруссия» ривожланишим учун энг яхши клуб. Ҳатто шундай дейишим мумкин: мен учун дунёда бундан яхши клуб йўқ!
- Ўтмишга назар ташлайдиган бўлсак, Чемпионшипдан сўнг дарҳол Бундеслигага ўтганингиздан фойда бўлдими?
- Менимча, ҳа! Жисмонан ажойиб формага киргандим, бошиданоқ менга ишонч билдиришлари мумкин эди. Ўтган йил эса анча машаққатли бўлди, албатта, ўзига яраша ёқимли онлар ҳам бор. Рождество келганида эса дам олишим мумкинлигидан хурсанд бўлдим.
- ЕЧЛда жаҳон юлдузларига тўла «Манчестер Сити»га қарши ўйинда отангиз қаршисида ўйнаш қандай бўлди?
- Бунга ақл бовар қилмайди! Мен майдонда эдим ва Кевин де Брюйне, Фил Фоден ва Илкай Гюндоган каби буюк футболчиларни кўрдим, улар ортида Пеп Гвардиола турарди. Лекин мен учун энг муҳими, отамнинг трибунада бўлгани эди. У мени охирги марта «Бирмингем»нинг «Рединг»га қарши уй учрашувида кўрганди. Ўшанда отам туғилган кунини нишонлаётганди, афсуски, биз ютқаздик.
- Ўшандан бери кўп нарса ўзгарди.
- Албатта! Дортмундга бордим ва янада ривожландим. Ҳали-ҳамон болалик давримдагим суҳбатларимиз ҳақида ўйлайман. Гап эндигина профессионалларга қадам қўйган ёш футболчилар ҳақида борарди.
- 17 ёшда аллақачон Бундеслигада тан олинган футболчи мақомига эришилган ўша босқичдаги каби...
- Отам аввалги суҳбатларимизда ҳамиша «Чемпионатда 100та ўйин ўтказа олсанг, муваффақиятга эришасан», деб айтардилар. Ҳали бунгача етиб бормадим.
- Ўтган йили ҳамма нарсани бажара олдингиз...
- Мен учун барчаси ажойиб бўлди, ҳақиқатан ҳам, ақл бовар қилмас даражада жуда тез ўтди! Англия термаси сафида Европа чемпионатида ўйнаш ажиб бир туйғу эди. Финалда мағлуб бўлиш буларнинг барчасига соя сола олмайди, деб ўйлайман. Биз жуда муваффақиятли турнир ўтказганимизни ҳеч ким унутмаслиги керак.
- Ўтган йилги каби яна ёзги таътилни хотиржам ўтказмадингиз.
- Лекин битта асосий фарқ бор. Бу сафар нима кутишни билардим ва Европа чемпионати якунланганидан сўнг Дортмундга ишонч билан қайтдим. Техникамга сайқал бердим, жисмонан кучлироқ бўлдим, ҳақиқатан ҳам, ҳар жабҳада ривожландим.
МУҲАММАДХОН тайёрлади
