Франциянинг «ПСЖ» раҳбарияти жамоа Франция Кубогининг 1/8 финал босқичида "Ницца" жамоасига имкониятни бой бериб, турнир билан хайрлашганига қарамай, жамоа бош мураббийи Маурисио Почеттинони ўз лавозимида сақлаб қолмоқда.

Муваффақиятсиз ўйин кўрсатганига қарамай, аргентиналик мухатассиснинг "ПСЖ"даги ўрни кучли. Клуб раҳбарияти унинг истеъфоси вариантини кўриб чиқмаяпти, деб ёзмоқда RMC Sport.

Франция Кубогидан чиқиб кетганидан сўнг, парижликлар бор эътиборини бу мавсумда жамоа олдидаги бошқа мақсадларга қаратмоқчи. Чемпионатда «ПСЖ» 11 очко билан пешқадамлик қилмоқда, Чемпионлар лигасининг 1/8 финалида «Реал» билан тўқнаш келади.

«ПСЖ» раҳбарияти Почеттинони истеъфога чиқаришни режалаштирмаяпти, чунки бу жамоага зарар етказади ва диққатини ўз мақсадларига қаратишга халақит беради деб ҳисобламоқда.

Аргентиналик мураббий «ПСЖ»ни 2021 йилнинг январь ойида қабул қилиб олганди. Унинг қўл остида жамоа ўтган мавсум чемпионлик учун курашда «Лилл»га ютқазди, ярим финалда «Манчестер Сити»дан мағлубиятга учраб, Чемпионлар Лигасидан чиқиб кетди, аммо Франция Кубоги ва Суперкубогини қўлга киритди.