«Реал» бош мураббийи Карло Анчелотти Испания кубогининг чорак финал босқичи доирасида бўлиб ўтган «Атлетик Бильбао»га қарши ўйин (0:1) борасида ўз фикрини билдириб ўтди.

«Қайғудамиз. Чунки барча мусобақаларда ғалаба қозонишни истагандик. Биз Суперкубокни қўлга киритдик. Олдимизда яна 2та мусобақа мавжуд. Бугунги мағлубият кейинги ўйинларимизга таъсир қилади, деб ўйламайман. Аксинча, ушбу мағлубият бизни кучлироқ қилади. Бугунги баҳсда бизга қийин бўлди. Таркибимизда йўқотишлар бор эди. Рақиб Винисиусга кучли босим ўтказгани бор гап. Аммо бунда ҳеч қандай ғайритабиий нарса йўқ.

Йович, Азар ёки Бэйл нима учун майдонга тушмади? Кроос ўйин давомида чарчаб қолгани учун унинг ўрнига Камавингани туширишга мажбур бўлдим. Шундан сўнг менда ўйинни ўзгартириш учун имкониятлар қолди ва мен улардан қўшимча бўлимларда фойдаланмоқчи эдим. Афсуски, биз ўйин сўнгида гол ўтказиб юбордик. Шу боис, бошқа ўйинчиларга имконият бериш учун вақт қолмади.

Аслида биз нима учун Себальос ёки Карвахал ҳақида эмас, ушбу ўйинчилар ҳақида гаплашяпмиз? Адолат юзасидан Себальос ва Вальехо ҳақида ҳам гапиришимиз керак.

"Реал"нниг бугунги муаммоси шундан иборат бўлдики, рақиб майдони атрофида кўп ўралашдик. Рақиб жарима майдонига тўпни кўпроқ етказишимиз керак эди. Тўпни эгаллаганимизда қанотлардан ҳужум ташкил қилишга уриндик. Аммо барчаси ўзимиз истагандек чиқмади», — деди Анчелотти.