«Real» bosh murabbiyi Karlo Anchelotti Ispaniya kubogining chorak final bosqichi doirasida bo‘lib o‘tgan «Atletik Bilbao»ga qarshi o‘yin (0:1) borasida o‘z fikrini bildirib o‘tdi.

«Qayg‘udamiz. Chunki barcha musobaqalarda g‘alaba qozonishni istagandik. Biz Superkubokni qo‘lga kiritdik. Oldimizda yana 2ta musobaqa mavjud. Bugungi mag‘lubiyat keyingi o‘yinlarimizga ta’sir qiladi, deb o‘ylamayman. Aksincha, ushbu mag‘lubiyat bizni kuchliroq qiladi. Bugungi bahsda bizga qiyin bo‘ldi. Tarkibimizda yo‘qotishlar bor edi. Raqib Vinisiusga kuchli bosim o‘tkazgani bor gap. Ammo bunda hech qanday g‘ayritabiiy narsa yo‘q.

Yovich, Azar yoki Beyl nima uchun maydonga tushmadi? Kroos o‘yin davomida charchab qolgani uchun uning o‘rniga Kamavingani tushirishga majbur bo‘ldim. Shundan so‘ng menda o‘yinni o‘zgartirish uchun imkoniyatlar qoldi va men ulardan qo‘shimcha bo‘limlarda foydalanmoqchi edim. Afsuski, biz o‘yin so‘ngida gol o‘tkazib yubordik. Shu bois, boshqa o‘yinchilarga imkoniyat berish uchun vaqt qolmadi.

Aslida biz nima uchun Sebalyos yoki Karvaxal haqida emas, ushbu o‘yinchilar haqida gaplashyapmiz? Adolat yuzasidan Sebalyos va Valyexo haqida ham gapirishimiz kerak.

"Real"nnig bugungi muammosi shundan iborat bo‘ldiki, raqib maydoni atrofida ko‘p o‘ralashdik. Raqib jarima maydoniga to‘pni ko‘proq yetkazishimiz kerak edi. To‘pni egallaganimizda qanotlardan hujum tashkil qilishga urindik. Ammo barchasi o‘zimiz istagandek chiqmadi», — dedi Anchelotti.