Хабар берганимиздек, жамоамизнинг Туркиядаги ўқув-йиғин машғулотлари бошланди.

Бош мураббий Шуҳрат Мақсудов Анталиядаги илк кунги машғулотларда футболчиларга жиддий юкламалар бергани йўқ. Бу табиий ҳол, зеро футболчилар эрта тонгда Тошкентдан Анталия томон парвоз қилиб, меҳмонхонага келиб, тушликдан сўнг бемалол ҳордиқ чиқаришларига вақт камлик қилди. Албатта бу машғулотларда инобатга олинди.

Айтиш керак, Шуҳрат Мирусмоновичнинг қарори ва албатта клуб раҳбариятининг тасдиғига кўра, 2021 йил Ўзбекистон миллий терма жамоасининг Швецияга қарши ўртоқлик учрашувида тиззасидан жиддий жароҳат олган Фаррух Икромов ҳам Анталиядаги йиғинга олиб келинди. Иқтидорли футболчи жиддий жароҳатдан сўнг бугундан бошланган йиғинда енгил югуришни бошлади. Майдондан ташқарида қолган бўлса-да, клуб эътиборидан четда қолмаган иқтидорли футболчимиз тезроқ сафга қайтиб, “Бунёдкор”нинг ғалабаларига ҳисса қўшишининг тилакдошимиз!