Чемпионлар лигаси 1/8 финалининг илк учрашувида Мадриднинг “Реал” клуби сафарда Франциянинг “ПСЖ” жамоаси билан учрашди. Карло Анчелотти шогирдлари сўнгги дақиқаларда ўз дарвозасидан гол ўтказиб юбориб, 0:1 ҳисобида мағлуб бўлди. Ягона гол Килиан Мбаппе номига ёзилди.
Қайд этиш жоизки, кеча “қаймоқранглилар” ҳужум чизиғи ниҳоятда пассив ўйин кўрсатишди. Мадридликлар бутун ўйин давомида рақиб дарвозасига бор йўғи учта зарба йўллади. Opta Sports нашри хабарига кўра, бу "Реал Мадрид"нинг 2003/2004 йилги мавсумдан бери Чемпионлар лигасидаги энг ёмон кўрсаткичидир.
Эслатиб ўтамиз, жавоб ўйини 9 март куни Мадриддаги "Сантьяго Бернабеу" стадионида бўлиб ўтади.
