Июль ойига қолдирилган «Насаф» – «Нефтчи» учрашувидан ташқари, 3-турнинг барча учрашувлари бўлиб ўтди. Тур доирасидаги сўнгги баҳс 9 апрель куни Тошкентдаги «Жар» стадионида бўлиб ўтди. Унда «Бунёдкор» «Шўртан»ни 3:0 ҳисобида мағлубиятга учратди.
Учрашувда ҳисоб 19-дақиқада очилди. «Бунёдкор»нинг чап қанотдан, Шавкат Саломов ва Лутфулла Тўраев иштирокида ташкил этган ҳужуми, охир-оқибат Баҳодир Пардаевнинг голи билан якунига етди.
«Шўртан»да биринчи бўлимда ҳам, иккинчи бўлимда ҳам ҳисобни тенглаштириш учун қатор имкониятлар бўлди, бироқ Игорь Криушенко шогирдлари улардан унумли фойдалана олишмади. «Бунёдкор» эса 75-дақиқага келиб ҳисобдаги фарқни оширди. Бу вазиятда жарима зарбасини амалга оширган Шавкат Саломовнинг маҳорати ҳал қилувчи роль ўйнади.
Учрашув асосий вақти якунланишига уч дақиқа қолганида Анваржон Солиев ўз номини таблога ёздириб қўйди. Камолиддин Мурзоевнинг зарбасидан сўнг қайтган тўпга биринчи бўлиб етиб келган фахрий футболчи ҳисобни йирик кўринишга келтирди. Қайд этиш жоиз, бу вақтда Солиевнинг майдонга тушганига икки дақиқа ҳам бўлмаган эди.
3:0 ҳисоби ўйин якунига қадар ўзгармади. Ушбу натижадан сўнг, очколари сонини 7тага етказган «Бунёдкор», тўплар нисбатига кўра, Олий Лига пешқадамига айланди. Тошкентнинг бошқа бир жамоаси — «Пахтакор» ҳисобида ҳам етти очко бор. Ҳозирча фақат «Насаф» йўқотишларсиз бормоқда.
Бунгача чемпионатда карвонбошилик қилиб келган «Шўртан» эса 4-ўринга тушиб кетди.
Олий Лига, 3-тур
9 апрель, душанба
БУНЁДКОР – ШЎРТАН 3:0 (1:0)
ГОЛЛАР: Баҳодир Пардаев (19), Шавкат Саломов (75), Анваржон Солиев (87).