Фарғонанинг «Нефтчи» клуби ОФК Кубоги «D» гуруҳидаги пешқадамликни бой берди.

«D» гуруҳидан ўрин олган иккинчи ўйин Ҳиндистонда, маҳаллий чемпиони «Салгокар» ҳамда Иордания гранди «Ал-Виҳдат» ўртасида бўлиб ўтди. Баҳс 2:1 ҳисобида иорданиялик футболчилар фойдасига ҳал бўлди.

Учрашувда ҳисоб 8-дақиқада «Ал-Виҳдат» футболчиси Амир Абу Ҳувайтий томонидан очилди. «Салгокар» 58-дақиқадан бошлаб майдонда бир киши кам бўлиб қолганига қарамай, 72-дақиқада Исфоқнинг голи эвазига ҳисобни тенглаштирувчи гол муаллифига айланди.

Бироқ, «Нефтчи»нинг бахтига қарши ўлароқ, ҳиндлар дуранг натижани сақлаб қола олишмади. 82-дақиқада Шилбаяҳ томонидан киритилган гол «Ал-Виҳдат»га 2:1 ҳисобидаги муҳим сафар ғалабасини тақдим этди.

Ушбу ғалабадан сўнг «Ал-Виҳдат» ҳисобдаги очколар 9тага етиб, жамоа ўз гуруҳида пешқадам бўлиб олди. Иккинчи ўринга тушган «Нефтчи» ҳисобида эса 8 очко бор, эътиборли томони, Саркисян шогирдлари, асосий рақибларидан фарқли ўлароқ, ҳали бирорта ҳам ўйинда мағлубиятга учрашмаган.

ОФК Кубоги, «D» гуруҳи, 4-тур
10 апрель, сешанба
САЛГОКАР (Ҳиндистон) – АЛ-ВИҲДАТ (Иордания) 1:2 (0:1)
Голлар: Исфоқ (72) — Амир Абу Ҳувайтий (8), Шилбаяҳ (82).
Четлатиш: Мейтей (58).