Саудия Арабистони чемпионатининг 22-тури доирасида «Ан-Насср» клуби ўз майдонида «Абҳа» клубини қабул қилди.

Баҳснинг 37-дақиқасида мезбонлар Абубакарнинг голи эвазига ҳисобни очишган бўлса, иккинчи бўлимнинг 69-дақиқасида эса Матич ҳисобни тенглаштирди.

Учрашувнинг 78-дақиқасида мезбонлар устози майдонга Жалолиддин Машариповни туширди. Ҳамюртимиз ўз жамоаси ўйинини кучайтиришга муваффақ бўлди ва бир нечта хавфли ҳужумларга асос солди.

Ўйинга қўшиб берилган 7 дақиқа тугашига 40 сония қолганида Машарипов чиройли пас билан Абубакарни дарвозабон билан яккама-якка вазиятга чиқариб юборди ва ҳужумчи бу имкониятдан самарали фойдаланиб, «Ан-Насср»га ғалаба келтирди.

Ушбу ғалабадан сўнг Машарипов жамоаси ўз очколарини 44тага етказди ва жадвалда 2-поғонада бормоқда.