Муборакнинг "Машъал" клуби ўз майдонида 100 фоизли натижа қайд этишда давом этмоқда. Владимир Фомичев шогирдлари бу сафар "Олмалиқ" жамоаси билан ўйинда 3 очкони қўлга киритишга муваффақ бўлишди.
Ушбу жамоалар ўртасидаги ўйин шуниси билан аҳамиятли эдики, унда ғалаба қозонган жамоа юқори ўринлар учун курашишда яхши имкониятга эга бўларди. Қолаверса, "Олмалиқ" ҳужумчиси Зафар Холмуродов ўзининг собиқ жамоасига қарши майдонга тушганди.
Ўйин ҳар иккала жамоа учун қийин кечди. Дастлабки 45 дақиқаликда дарвозаларга тўп киритилмади. Иккинчи бўлим бошида мубораликларнинг тажрибали футболчиси Габит Сапаргалиев ҳисобни очишга муваффақ бўлди. Орадан 10 дақиқа ўтиб, олмалиқлик Азамат Исроилов ҳисобни тенглаштирди.
Табиийки, дурангга рози бўлмаган майдон эгалари олдинга интилишди ва 78-дақиқада жарима майдончасида ишлатилган қўполлик учун Владислав Цейтлин Павел Харчик қўриқлаётган дарвоза томон пенальти белгилади. "Машъал"нинг тўпурар футболчиси Самандар Шодмонов "стандарт"ни аниқ амалга ошириб, ҳисобни 2:1га етказди (Шодмоновнинг голлари сони 3та етди).
Ўйин эса худди шу ҳисоб билан тугади ва "Машъал" 7 очко билан 4-ўринга кўтарилиб олди.
ОЛИЙ ЛИГА. 4-ТУР.
"МАШЪАЛ" - "ОЛМАЛИҚ" - 2:1 (0:0)
Голлар: Габит Сапаргалиев (48), Самандар Исроилов (78-пен.) — Азамат Исроилов (59)
«Машъал»: Санжар Қувватов, Алик Ҳайдаров, Дилявер Ваниев, Илья Фомичев, Тони Линденберг, Элдор Эргашев, Игорь Петкович, Габит Сапаргалиев, Шуҳрат Муҳаммадиев (Шаҳзод Шаймонов, 61), Самандар Шодмонов, Аббос Шодмонов (Мирзоҳид Ғофуров, 14).
«Олмалиқ»: Павел Харчик, Азамат Исроилов, Артём Никитенко, Сирож Ҳамроев, Достон Абдураҳмонов, Зафар Тўраев (Александр Востриков, 50), Зафар Холмуродов, Санжар Шоаҳмедов (Александр Лупашко, 83), Зоҳир Пиримов (Исроил Эргашев, 62), Олег Зотеев, Дарко Станоевич.