“Милан” ҳужумчиси Златан Ибраҳимович фаолиятини давом эттириш ниятида эканлигини тасдиқлади.

“Менинг келажагим футбол билан боғлиқ. Мен ҳали ҳамон жуда фаолман. Охирги ўйинларни ўтказиб юборганим жуда оғриқли бўлди.

"Милан"га қайтганимдан бери биз ажойиб ишларни қилдик: бизга фақат битта нарса керак - совринларни ютиш. Мен бу жамоа билан ғалаба қозонмагунимча таслим бўлмайман", - дея Ибраҳимовичнинг сўзларидан иқтибос келтиради журналист Николо Скира.

40 ёшли швед жорий мавсумда “Милан” сафида 19 ўйинда 8 та гол урди ва 2 та голли узатмани амалга оширди. Унинг Италия клуби билан шартномаси 2022 йилнинг 30 июнига қадар мўлжалланган.