«Аталанта» ёшлар жамоаси мураббийи Мино Фавинининг сўзларига кўра, умри қисқа бўлган Пьермарио Морозини «тилла одам эди». Бу ҳақда «Football Italia» интернет-нашри хабар бермоқда.
«Ливорно» футболчиси Пьермарио Морозини 14 апрель куни, Италия «В» Серияси доирасида бўлиб ўтган «Пескара» – «Ливорно» учрашувининг 31-дақиқасида хушини йўқотган ва юрак хуружидан вафот этган.
Футболчи «Ливорно»да ижара асосида тўп сурарди. Морозинининг трансфер ҳуқуқи «А» Серия вакили – «Удинезе»га тегишли эди.
«У тилла одам эди, ҳар вақт ўз оиласига ёрдам беришга ҳаракат қиларди», - деди Фавини.
«У Аталантада ўсган, мен уни болалигидан қандай футбол ўйнашини кўриб келганман. У ҳар доим ҳар кимга ёрдам беришга ҳаракат қиладиган фантастик йигит эди. У фақат оиласи учун яшарди», - деди «Аталанта» ёшлар жамоаси устози.
«Лекин у шундай бахтсиз инсон эди: у ёшлигида ота-онасидан етим қолган, акаси ва опасининг жисмоний имкониятлари чегараланган. Укаси яқинда ўзини деразадан ташлаб, ўз жонига қасд қилганди. Унинг ҳаётига ҳавас қилиб бўлмасди», - деди Фавини.
«Удинезе» уни биздан сотиб олганди, Морозини жуда иқтидорли эди. Фаолияти кучли эди, жамоадошлари ҳар доим ҳурмат қилишарди. Қаерга бормасин, уни юқори баҳолашарди. У олтин қалб эгаси эди», - дея қўшимча қилди «Аталанта» ёшлар жамоаси устози Мино Фавини.