«Эльче»нинг аргентиналик ярим ҳимоячиси Хавьер Пасторе Испания чемпионатининг 27-тури доирасидаги «Барселона»га (1:2) қарши ўйинда ҳакамни ҳақорат қилгани учун жиддий жазога тортилиши мумкин, деб хабар беради Infobae.

Воқеа 88-дақиқада содир бўлди. Пасторе ҳакам Алехандро Эрнандеснинг қароридан норози бўлиб, уни «фоҳишанинг ўғли» деб атади. Ўша пайтда аргентиналик футболчи майдонда бўлмагани учун ҳакам футболчининг гапини эшитмади. Бироқ захира ҳаками уни эшитиб, бу ҳақда Эрнандесга хабар берди. Бунинг учун Пасторе қизил карточка олди ва энди у 4 дан 12 та ўйинга дисквалификаcия қилиниши кутилмоқда.

32 ёшли Пасторе жорий мавсум «Эльче» сафида 12 та ўйинда майдонга тушди.