«Манчестер Юнайтед» устози Ральф Рангникнинг Криштиану Роналду жароҳати туфайли «Манчестер Сити»га қарши дербини ўтказиб юборгани ҳақидаги сўзлари ҳеч кимни ишонтира олмади. «Қизил иблислар» ўйинда мағлубиятга учрагач, турли миш-мишлар пайдо бўлди, жумладан, Криштиануга яқин бўлган cr7.o_lendario инстаграм аккаунтида Роналду асосий таркибга киритилмаганига норозилик сифатида Португалияга учиб кетгани айтилганди. Бу постни Роналдунинг синглиси Катья Авейро қўллаб-қувватлаган ва унга изоҳ қолдирган.
- Криштиану Роналду соппа-соғ — юз фоиз. Менга ўхшаб Рангникдан ғазабланган барчага хайрли тонг, чунки у баъзи мудофаа тактик режаларидан келиб чиқиб, CR7’ни захира ўриндиғида қолдиришга қарор қилиб, барчанинг дам олиш кунини барбод қилди, деб ёзди Катья.
