«ПСЖ» ҳужумчиси Неймар Чемпионлар лигаси 1/8 финалининг жавоб учрашувида «Реал»га (1:3) мағлуб бўлганидан кейин дарвозабон Жанлуижи Доннарумма билан можаро бўлгани ҳақидаги миш-мишларни инкор қилди.
«ПСЖ» турнирдан чиқиб кетганидан сўнг ОАВда бразилиялик ва италиялик футболчилар кийиниш хонасида ўзаро жанжаллашиб қолишгани, ўйин давомида йўл қўйилган хатоларда бир-бирини айблаши ҳақида хабарлар тарқалганди.
Инстаграмда Неймар Доннарумма билан можаро ҳақидаги мақоланинг скриншотини жойлаштирди ва унга дарвозабон билан ёзишмаларнинг скриншотини илова қилди.
Жанлуижи жамоадошига можаро ҳақидаги хабарларга ҳавола юборди ва шундай деб ёзди: «Салом Ней. Кечаги иш учун афсусдаман. Аммо бундай хабарларни қабул қилиб бўлмайди».
