Озарбайжонда анъанавий ўтказиладиган «Каспий Кубоги» мусобақаси шу йилнинг 29 май – 5 июнь кунлари оралиғида Боку шаҳрида бўлиб ўтади. 8та мамлакат ўсмирлар терма жамоаси (U17) иштирок этадиган турнирда Ўзбекистон ўсмирлар терма жамоаси ҳам қатнашади.
Қуръага кўра «А» гуруҳида мезбон Озарбайжон – Қирғизистон, Туркманистон ва Қозоғистон ўсмирларига қарши кураш олиб боради. Нисбатан кучли бўлган «Б» гуруҳини Япония, Туркия, Грузия ва Ўзбекистон терма жамоалари ташкил этишди.
Мусобақа регламентига кўра ҳар бир иштирокчи мамлакат 18 нафар футболчини рўйхатга киритиш имконига эга. Ўйинлар Бокудаги «Азал» ва «Далга» стадионларида бўлиб ўтади. Гуруҳларда 1-ўринни қўлга киритган мамлакатлар финалга йўлланма олишса, 2-ўрин соҳиблари турнирнинг 3-ўрин эгасини аниқлаш йўлида кураш олиб боришади. Мос равишда мусобақанинг 5 ва 7-ўринлари учун ҳам ўйинлар ташкил этилади.
«Каспий Кубоги»да 17 ёшгача бўлган футболчилардан тузилган терма жамоалар иштирок этиши белгилаб қўйилган. УЕФА миқёсидаги мусобақаларда ҳар бир ёш учун қитъа чемпионати ўтказилиши сабаб, Европа мамлакатлари бу борада ҳеч қандай муаммога дуч келишмайди. ОФК эса ўсмирлар (U16) ва ёшлар (U19) терма жамоалари ўртасидагина қитъа чемпионати ўтказади. Шу сабабли Ўзбекистон турнирда қолган жамоаларга қараганда бир ёш кичик бўлган футболчилар билан иштирок этади. Ўз навбатида «Каспий Кубоги» Дилшод Нуралиев шогирдларига шу йилнинг 21 сентябрь – 6 октябрь кунлари Эронда бўлиб ўтадиган ўсмирлар ўртасидаги Осиё чемпионати олдидан навбатдаги тайёргарлик вазифасини ўтаб беради. Қуйида терма жамоа иштирокидаги ўйинлар санаси билан танишинг:
30 май (1-тур)
Япония – Ўзбекистон
31 май (2-тур)
Ўзбекистон – Туркия
2 июнь (3-тур)
Грузия – Ўзбекистон
4 июнь куни 7, 5, 3 ва 1-ўрин учун беллашувлар ташкил этилади.
