Испаниянинг «Вильярреал» бош мураббийи Унаи Эмери «Ньюкасл» жамоасини бошқаришга яқин келганини айтди. Мутахассис фаолиятини давом эттириш учун бундай вариантни жиддий кўриб чиққанини, аммо кейинчалик Испанияда қолишга қарор қилганини эслади.

«Ньюкасл лойиҳаси жозибадор, чунки у асосга эга. Бу ерда «Арсенал»дан фарқли равишда жамоа қуриш осонроқ.

«Арсенал»да жамоани нолдан қуришни бошлаш учун аввалига ҳамма нарсани йўқ қилиш керак эди. «Ньюкасл»да бундай нарса йўқ ва менга шундай клубдан бошлаш ғояси ёққанди.

Премьер-лига барча учун, мураббийлар учун жозибали лига. Шу боис «Ньюкасл» менга қўнғироқ қилганида, Англияга қайтиш, жиддий лойиҳа устида иш бошлаш имконияти ҳақида кўп ўйладим. Мен учун бу ғурур, қониқиш манбаи эди ва мен буни қадрладим. Лекин менимча, биз таклифни тинглаб, кейин кўриб чиқишимиз керак.

Мен бу таклиф ҳақида ўйладим ва "Вильярреал" президенти Фернандо Роиг билан гаплашдим. Аммо мавсум ўртасида «Вильярреал» билан Чемпионлар лигасида ўйнаганимизни ҳам ҳисобга олишим керак эди. Якунда «Вильярреал»га ва «Ньюкасл»га катта ҳурмат билан шу ерда қолишга қарор қилдим. Мен бахтлиман ва биз муҳим ишни бажаряпмиз” - деди Эмери.