Ўзбекистон миллий терма жамоаси аъзоси Баҳодир Насимов кетма-кет иккинчи бор Озарбойжон чемпионлигини қўлга киритди.

30-турда «Карабах» клубига қарши майдонга тушган Бокунинг «Нефтчи» клуби қийинчилик билан зафар қучди – 2:1. Мавсум якунига яна икки тур бор эканини инобатга олган мезбонлар ўйинни анча ҳотиржам бошлашди. Аксинча, «Карабах» учун ўйин муҳим аҳамиятга эга бўлиб, меҳмонлар Еврокубоклар учун кураш олиб боришаётганди. 67-дақиқада Жаводов ҳисобни очганига қарамай, «Карабах» футболчилари ғалабани ушлаб қола билишмади. 71-дақиқада Абдуллаев ҳисобни тенглаштирган бўлса, «Нефтчи»га чемпионликни тақдим этган гол 91-дақиқада пенальтидан киритилди. Баҳодир Насимов жароҳати сабаб майдонга туша олмади.

Шундай бўлсада Баҳодир Насимов 16та гол билан миллий чемпионат тўпурари бўлиб турибди. Насимовнинг «Кяпаз» клубидаги таъқибчиси Фоменко ҳисобида 11та гол бор.

Қайд этиш керак, 17 май куни Озарбойжон Кубоги финали бўлиб ўтади. Ўзига хос Боку дербисида «Нефтчи» миллий чемпионатда 5-ўринда бораётган «Боку» клубига қарши саф тортади.