"Пахтакор" бош мураббийи Славче Войнески «Ад-Дуҳайл» билан ўйин олдидан ўз фикрларини билдирди.
«Эртага бизни кучли жамоага қарши кескин ўйин кутиб турибди деб ўйлайман. «Ад-Дуҳайл» ҳужумкор футбол ўйнашга интиладиган ва ҳимояда ҳам яхши ўйнайдиган жамоа. Бу беллашувда камроқ хато қилган тараф ютиб кетади. Рақиб таркибида индивидуал кучли футболчилар ҳам етарлича.
Биринчи ва иккинчи ўйинлар ўртасидаги асосий фарқ шароитларга яхшироқ мослашиб олганимизда бўлди. Бу ерга чемпионатдаги қийин баҳсдан кейин келдик, учинчи куни майдонга тушдик.
Ва ўшанда иккинчи бўлимда жисмонан толиққанимиз сезилиб қолди. "Сепахан" билан биринчи бўлимда ёмон ўйнамагандик. Иккинчи беллашувга эса шароитларга мослашган ҳолда тайёрландик, жуда яхши ўйин ўтказдик», — дейди Войнески.
