Жорий йилнинг июн ойида юртимиз майдонларида бўлиб ўтадиган У-23 Осиё кубоги ўйинларига тайёргарлик ишлари қизғин давом этмоқда. Хусусан, ЎФА ишчи гуруҳи томонидан ўйинлар ва машғулотлар бўлиб ўтадиган ҳудудлар ҳамда у ердаги мавжуд шароитлар ўрганилиб, ОФК стандартига мос келишини таъминлаш бўйича ишлар олиб бориляпти. Айни кунларда ташкилий қўмита вакиллари Қашқадарё вилоятида бўлиб туришибди.
Кун тартибига кўра, дастлаб Қарши шаҳридаги “Марказий” стадиони, кийим алмаштириш хоналари, матбуот анжумани ўтказиладиган заллар кўздан кечирилди. Шунингдек, жамоалар машғулот ўтказадиган майдонларнинг ОФК талабига мос ҳолатга келтириш ишлари ўрганилди. Бунда майдонларнинг сифатига алоҳида эътибор қаратилмоқда.
Шунингдек, жамоалар жойлашадиган меҳмонхоналарда яратилган шароит ва қулайликлар ОФК талабларига жавоб бериши назоратга олинди. Ташкилий қўмита вакиллари мутасаддиларга режага мувофиқ кейинги қилиниши керак бўлган вазифалар юзасидан кўрсатма ва тавсияларини бердилар.