Юрген Клопп «Эвертон» устидан қозонилган ғалабадан сўнг ўз таассуротлари билан ўртоқлашди.

Англия чемпионатининг 34-турида «Ливерпуль» дербида "Эвертон" устидан 2:0 ҳисобида ғалаба қозонди.

“Яратганга шукур, футболда иккита тайм бор. Биринчисида унчалик яхши ўйнамадик. Рақиб бизга муаммо туғдирди, биз уларнинг охирги ҳимоя чизиғидан ўта олмадик. Бизга ҳаракат етишмади.

Биз етарлича тезкор ҳаракат қилмадик, рақибнинг тўққиз нафар футболчиси бўлган зоналарга ўтдик. Пикфорд тўпни ҳар гал ушлаб олганида беш дақиқа ушлаб турди, шунинг учун биз уларнинг паст блокини ёриб юбориш ритмини топа олмадик. Биз «Эвертон»дан шундай ўйин кутгандик.

Сўнгги ойларда қўлга киритган ғалабаларимиз сони ҳақиқатга тўғри келмайди. Ишлаш керак. Йигитлар буни яна қилишди ва мен жуда хурсандман.

Агар кимдир бундай ўйинлардан осонгина ўтамиз, деб ўйласа, кечирим сўрайман, лекин бундай бўлмайди. Аммо бугунгидек муҳит ярата олсак, 95 дақиқа биз билан курашиш жуда қийин бўлади” - деди «Ливерпуль» бош мураббийи.