АГМК бош мураббийи Миржалол Қосимов Суперлига 5-туридан ўрин олган "Қўқон-1912"га қарши бўлиб ўтган (3:0) баҳс ҳақида гапирди.
"Ҳеч бир баҳс осон ўтаётгани йўқ. Чемпионатда курашларга бой ўйинлар кўп бўлмоқда. Ўз имкониятлардан фойдалана олган омадли жамоа ғалабага эришмоқда. Бугун ҳам шу каби ўйин бўлди, гарчи бир киши кўп бўлиб ўйнаган бўлсакда учрашув осон ўтгани йўқ. Мавсум стартини яхши бошлай олмадик, ҳозирда бизга очколар жуда зарур. Ҳар бир ўйинда ғалаба учун майдонга чиқишимиз, мухлисларимиз олдида юзимиз ёруғ бўлиши учун ҳаракат қилишимиз зарур.
Бугунги ўйин тенг курашлар остида бошланди. Биринчи голни урганимиздан сўнг бир оз енгил тортдик ва устунлик биз томонга ўтди. Раҳматуллаевнинг қизил карточкаси бизга ас қотди ва ўйинни назорат қилишимизга хизмат қилди. Лекин "Қўқон-1912" охиригача кураш олиб борадиган яхши жамоа эканини билардик. Улар 10 киши бўлиб қолганликларига қарамай бизга қийинчилик туғдира олишди. Энг муҳими, 3 очкони қўлга киритдик. Эндиликда навбатдаги тур учрашувларига тайёргарликка киришамиз. Олдинда бизни "Пахтакор"га қарши ўйин кутиб турибди. Май ойидаги ўйинлар тақвими анча зич, футболчилар ўйин ва тикланиш ва яна ўйин режимида бўлишади. Буёғига иложи борича кўпроқ очко жамғаришимиз зарур. Шу ўринда бугун бизни қўллаб-қувватлаган мухлисларимизга миннатдорчилик билдираман", - деди Қосимов.
