Аҳмаджон Мусаев мураббийлигидаги Ўзбекистон ёшлар терма жамоаси (U19) 2-8 сентябрь кунлари Вьетнамда бўлиб ўтадиган халқаро мусобқада иштирок этади.

"Тайёргарлик турнири-2012" деб номланувчи мусобақада Ўзбекистондан ташқари мезбон Вьетнам, шунингдек, Австралия ва Таиланд ёшлари терма жамоалари ҳам қатнашади. Қайд этиш керак, мазкур тўртала мамлакат шу йилнинг 2-18 ноябрь кунлари БААда бўлиб ўтадиган Осиё чемпионати йўлланмасини қўлга киритган.

Сўнгги Осиё чемпионати финалига қадар етиб борган Австралия ёшлар терма жамоаси 13 май кунги қуръа олдидан 1-саватдан жой олган. Ўзбекистон иккинчи саватда эътироф этилган бўлса, Вьетнам ва Таиланд 3-саватда кўрсатилган.

Бундан келиб чиқиб айтиш керакки, Вьетнам ва Таиланд ёшлари 13 май кунги қуръадан кейин бир гуруҳдан жой олишмайди. Қолган мамлакатларда эса бундай эҳтимол бор. "Тайёргарлик турнири-2012" сентябрда бўлиб ўтишини инобатга олсак, мазкур мамлакатлар қитъа чемпионатида бир гуруҳдан жой олганига қарамай, Вьетнамдаги Хо Ши Мин шаҳри мезбонлик қиладиган турнирга барибир ташриф буюради.