Англия чемпионатининг 35-турида «Манчестер Юнайтед» «Брентфорд» устидан 3:0 ҳисобида ғалаба қозонди.

Учрашувда Криштиану Роналду пенальтидан гол урди. Шу тариқа «Брентфорд» португалиялик ҳужумчи гол урган 168-жамоага айланди.

Роналду манкунианликлар сафида сўнгги 4 ўйинда 6 та гол уришга муваффақ бўлди. Аввалроқ Криштиану «Норвич» (3:2), «Арсенал» (1:3) ва «Челси»га (1:1) қарши баҳсларда ўз ҳисобига гол ёздириб қўйганди.

Шунингдек, Роналду «қизил иблислар»нинг АПЛдаги охирги 11 голидан 9 тасига муаллифлик қилди. 12 мартдан буён португалиялик футболчи «Тоттенҳэм» (3:2) ва «Норвич» (3:2) дарвозасига 3 тадан гол урди, «Арсенал»га (1:3) қарши ўйинда ҳам рақиб дарвозасини ишғол қилди. «Челси»га (1:1) қарши баҳсда эса Роналдунинг голи манчестерликларга дуранг натижа олиб келганди.

Криштиану АПЛ жорий мавсумидаги голлари сонини 18 тага етказиб олди ва «Манчестер Юнайтед»даги сўнгги мавсумида (2008/09, 18 та гол) қайд этган натижасини такрорлади.