Шотландиянинг “Рейнжерс” клуб бош мураббийи Жованни ван Бронхорст жамоасининг Европа лигаси финалига чиққани ҳақида фикр билдирди.

Глазголиклар биринчи ўйинда “Лейпциг” жамоасига минимал ютқазган бўлса-да, ўз уйида кечган жавоб ўйинида 3:1 ҳисобидаги ғалаба эвазига финалга йўл олди.

“Сўзларни топиш жуда қийин. Бу ажойиб кеча эди. Ўйин олдидан биз финалга чиқиш учун бор кучимизни ишга солишимизни айтгандик. Биринчи бўлимда биз хоҳлагандек иккита гол урдик.

Мен жуда фахрланаман. Таркибимизда еврокубоклар финалида ўйнаган футболчилар кўп эмас. Шундай экан, у ерга боргач, кубокни уйга олиб келиш учун ҳамма нарсани қилишимиз керак”, - деди нидерландиялик мутахассис ўйиндан кейин.

Европа лигаси финалида “Рейнжерс” Германиянинг “Айнтрахт” жамоасига қарши майдонга тушади.