Наманганнинг "Навбаҳор" клуби ҳимоячи Егор Кримец "лочинлар" сафини тарк этмагани ҳақида расмий баёнот берди.
"Бугун оммавий ахборот воситаларида маҳоратли ҳимоячи Егор Кримецнинг соғлиғидаги муаммолар сабаб “Навбаҳор” билан хайрлашганлиги ҳақида маълумотлар тарқалди.
Шу муносабат билан, “Навбаҳор” ПФК бу хабарлар ҳақиқатга тўғри келмаслиги, Егор Кримец ҳамон “Навбаҳор” билан бирга эканлиги, фақат жароҳатини даволатаётганлиги туфайли машғулотлар ва расмий учрашувларда қатнаша олмаётганини билдиради. “Навбаҳор” ПФК Кримецга мустаҳкам соғлик, тезроқ таркибга қайтиб, жамоамиз ғалабаларига ўз ҳиссасини қўшишини тилаб қолади.
Ўз навбатида, айрим ОАВ вакилларига “Навбаҳор” клубига тааллуқли ҳар қандай маълумотни чоп этишдан аввал унинг тўғрилигини текшириш, клуб расмийлари томонидан тасдиқланганидан кейин оммага эълон қилиниши мақсадга мувофиқ эканлигини эслатиб ўтмоқчимиз", - дейилади баёнотда.
