Ушбу ҳафтанинг шанба куни чемпионатимизнинг 9-турида «Андижон» ўз майдонида Муборакнинг «Машъал» клубини қабул қилади.

Ўтган турда «Локомотив» майдонидан дуранг билан қайтган жамоа аъзоларига икки кунлик танаффус берилганди. Кечадан бошлаб футболчилар клуб қароргоҳида тўпландилар ва кечки пайт «Соғлом авлод» стадионида шуғулландилар. Бугундан машғулолар кунига икки маҳалдан олиб борилади. Охирги ўйинларда анча ишончли ҳаракат қилишаётган футболчилар «Машъал»га қарши баҳсга жиддий тайёргарлик кўрмоқдалар.

Шу ўринда таъкидлаш жоизки, ҳар иккала жамоа таркибида йўқотишлар йўқ эмас. Мисол учун «Андижон»да шундоқ ҳам барча ўйинчилар майдонга туша олмаяптилар. Легионерларнинг жароҳати ҳали битгани йўқ. «Пахтакор» билан кечган баҳсда оёғидан лат еган Фарҳод Тоҳиров «Машъал» билан учрашувни ҳам ўтказиб юборади. Шунингдек ўша баҳсда Акбар Ходжаев қизил карточка туфайли майдонни эрта тарк этганди. «Локо» билан ўйинда эса Иброҳим Отахонов билан Анвар Раҳимовни ҳам майдондан четлатилганлигини билсангиз керак.

Ўз навбатида «Машъал» клубида ҳам муаммолар бор. Жумладан сербиялик ярим ҳимоячи Игор Петкович ҳамда иқтидорли футболчи Шуҳрат Муҳаммадиев жароҳат олишгани сабабли «Андижон»га қарши майдонга туша олмайдилар. Бундан ташқари Мирзоҳид Ғофуровда ҳам жароҳат бор.

«Андижон» - «Машъал» беллашуви 19 май куни «Соғлом авлод» стадионида соат 17.00да бошланади.