Бутун Бильбао фахрига айланиб улгурган «Атлетик» ҳужумчиси Иньяки Уильямс тахминан 6 йил олдин, яъни катта футболда илк марта кўриниш берганидаёқ Гана футбол ассоциацияси эътиборига тушганди.

Африкаликлар шундан буён ундан умидворлар. Бироқ Иньякининг ўзи Испания миллий жамоа­сида ўйнашга мойилдек. «Атлетик» вакили шу кунга қадар «қизил фурия»нинг 1та норасмий ўйинида қатнашди ва унда футбол фуқаролигини ўзгартириб, Гана термасини танлаш имконияти йўқ эмас. Қолаверса, Уильямс Ганани яхши кўради, ўзини шу мамлакат маданиятининг бир парчасидек ҳис қилади. У ҳаттоки, тви тили (Ганадаги маҳаллий тиллардан бири)ни яхши билади. Фақат шуниси борки, ҳужумчи ҳар доим, ҳамиша қалбан баск бўлиб қолишни хоҳлайди. Демак, у ҳамон халқаро даражада Испания миллий жамоаси шарафини ҳимоя қилиш ниятида. Иньяки The Guardian нашрига берган интервьюсида ҳам буни алоҳида таъкидлади.

- Ганада сизни ҳамон мамлакат миллий жамоасида кўришдан умидворлар. Бунга нима дейсиз?

- Ҳа, Ганада улғайдим, бундан алоҳида фахрланаман ҳам. Ҳозирги даражага етишишимда ушбу мамлакатнинг ўрни беқиёс, албатта. Ганаликлар мени ўз миллий жамоа­ларида кўришни хоҳлаётганлари ҳам қувонарли ҳол. Бироқ ўзимни алдашимга ҳожат йўқ - қалбан баскман. Ахир Испанияда, айнан Бильбаода туғилганман.

- Демак, Испания миллий жамоасида ўйнаш орзуси ҳамон сиз билан бирга, шундайми?

- Йўқ, бу иккинчи масала. Асосийси шуки, оиламнинг келиб чиқиш тарихини ҳам, аждодларимни ҳам ҳеч қачон унутмайман. Шунинг баробарида ўзимни баскдек ҳис қиламан. Тушунинг, бу борада кимнидир алдамоқчи эмасман. Ишончим комил, Гана термасига розилик берсам, анча қулайликларга эга бўламан. Аммо ҳақиқат битта - у ерда туғилмаганман, бу жамоада ўйнашга қалбим йўл қўймайди. Зеро, маданият, юриш-туриш ўз йўлига, қалб масаласи... Бинобарин, Ганада шундай футболчилар борки, улар учун миллий жамоа­дан чақирув олиш кўпроқ нарсани англатади. Ўйлайманки, чиндан ҳам, жамоа­да ўйнашга муносиб ва Ганани 100 фоиз ҳис қиладиган қайсидир йигит ўрнини эгаллашим тўғри эмас.

- Умуман, Гана футболига нечоғли қизиқасиз, дейлик, нималарни биласиз?

- Тўғриси, бу ҳақда онам кўпроқ маълумотга эга. Ҳар ҳолда, у Ганада футболни қай даражада яхши кўришларини жуда яхши билади. У ерда мухлислик ўзгача, ҳаттоки, футболчиларнинг оналари учун бироз хавотирли... Айтганча, онам асабийлашса ёки ғазабланса, бизни тви тилида уришади. Тўғри, одатда уйда асосан испан тилида гаплашамиз. Аслида ота-онам Испанияга кўчиб келган вақт биз учун инглиз тили асосий мулоқот воситаси бўлган, лекин уни секин-аста унутдик. Ҳа, ҳозир ҳам инглиз тилида суҳбатлашишим мумкин, лекин унча равон гаплашолмайман. Дейлик, бобом ва бувим қўнғироқ қилишса, улар билан тви тилида гаплашаман. Умуман, Гана маданияти, миллий таомлари ва анъаналаридан ҳамиша ҳайратланаман. Шу маданиятнинг бир парчаси эканлигимдан бағоят хурсанд­ман.

- Ганага саёҳат учун бориш қандай?

- О-о, зўр. Ота-онам пойтахт - Аккрадан. Албатта, бу шаҳарга тез-тез боришни истайман. Жуда чиройли жойлар кўп.