Мадриднинг "Реал" клуби бош мураббийи Хаби Алонсо навбатдаги муваффақиятсизликдан сўнг ўз позицияси ҳақида гапирди.

Якшанба куни "қаймоқранглилар" ўз уйида Ла Лига доирасида "Сельта"га ютқазди (0:2). Миш-мишларга кўра, агар чоршанба куни жамоа Чемпионлар Лигасида "Манчестер Сити"га ютқазса, испаниялик бош мураббий истеъфога чиқарилиши мумкин.

"Сити"дан мағлубиятга учраган тақдирда ишдан бўшатилиш? Бизнинг вазифамиз - уч очко тўплаш. Мана шуниси муҳим, ҳамма фикр шунда. Биз яхшироқ ўйнашга қодир эканлигимизни исботлашимиз керак. Вазиятни ўзгартира оламанми? Албатта. Биз бунга умумий саъй-ҳаракатлар билан эришамиз," - деди Алонсо матбуот анжуманида.

"Реал" Ла Лига турнир жадвалида "Барселона"дан 4 очко ортда қолиб, 2-ўринда бормоқда.