Маълумки, 1-19 июнь кунлари юртимизда 23 ёшгача бўлган футболчилар ўртасидаги Осиё чемпионати ўтказилади.
“Бунёдкор” стадиони қитъа биринчилигининг жами 9 та - гуруҳ босқичининг олти, чорак финал, ярим финал ва финал ўйинига мезбонлик қилади. Яна 9 та ўйин “Пахтакор” Марказий стадионида ўтказилса, “Локомотив” 8, Қаршидаги “Марказий” ўйингоҳи 6 та беллашувни қабул қилади. Шунингдек, “Бунёдкор” академиясининг учта майдони иштирокчиларга машғулотлар учун ажратилган. Бугун ишчи гуруҳ “Бунёдкор” стадиони ва академиясига ташриф буюриб, тайёргарликни кўздан кечирди.
“Бунёдкор” стадионининг ёритиш тизими ва майдоннинг ҳолати бўйича муаммо йўқ. Қолаверса, кийим алмаштириш, матбуот анжумани, ҳакам ва комиссар хоналари, улардаги шароит ҳамда жиҳозлар белгиланган талабларга тўлиқ жавоб беради. Таъкидлаганимиздек, “Бунёдкор” академиясининг учта майдони Осиё чемпионати иштирокчиларига машғулот ўтказишлари учун тақдим этилади. Айтиш керак, бу майдонлар бўйича ҳам муаммо йўқ. Майдонларнинг ҳолати аъло даражада. Ишонч билан айта оламизки, “Бунёдкор”га қарашли майдонлар Осиё чемпионати вақтида меҳмонларга муаммоларсиз хизмат қилади.
