Ma’lumki, 1-19 iyun kunlari yurtimizda 23 yoshgacha bo‘lgan futbolchilar o‘rtasidagi Osiyo chempionati o‘tkaziladi.
“Bunyodkor” stadioni qit’a birinchiligining jami 9 ta - guruh bosqichining olti, chorak final, yarim final va final o‘yiniga mezbonlik qiladi. Yana 9 ta o‘yin “Paxtakor” Markaziy stadionida o‘tkazilsa, “Lokomotiv” 8, Qarshidagi “Markaziy” o‘yingohi 6 ta bellashuvni qabul qiladi. Shuningdek, “Bunyodkor” akademiyasining uchta maydoni ishtirokchilarga mashg‘ulotlar uchun ajratilgan. Bugun ishchi guruh “Bunyodkor” stadioni va akademiyasiga tashrif buyurib, tayyorgarlikni ko‘zdan kechirdi.
“Bunyodkor” stadionining yoritish tizimi va maydonning holati bo‘yicha muammo yo‘q. Qolaversa, kiyim almashtirish, matbuot anjumani, hakam va komissar xonalari, ulardagi sharoit hamda jihozlar belgilangan talablarga to‘liq javob beradi. Ta’kidlaganimizdek, “Bunyodkor” akademiyasining uchta maydoni Osiyo chempionati ishtirokchilariga mashg‘ulot o‘tkazishlari uchun taqdim etiladi. Aytish kerak, bu maydonlar bo‘yicha ham muammo yo‘q. Maydonlarning holati a’lo darajada. Ishonch bilan ayta olamizki, “Bunyodkor”ga qarashli maydonlar Osiyo chempionati vaqtida mehmonlarga muammolarsiz xizmat qiladi.
