Ўзбекистон Суперлигаси 11-туридан ўрин олган “Навбаҳор” – “Локомотив” ўртасидаги учрашув арафасида “лочинлар”нинг 25 ёшли маҳоратли ҳимоячиси Рустамжон Ашурматов бўлажак ўйин ҳақидаги фикрлари билан ўртоқлашди.

"Хабарингиз бор, жамоамиз 9-турдаги “водий дербиси”да “Нефтчи” устидан ғалаба қозона олмади. Бўлажак рақибимиз “Локомотив” эса ўтган турда ўз майдонида “Пахтакор”га имкониятни бой берди. Шу боис, бўлажак баҳснинг кескин курашлар остида эҳтимоли юқори. Биз фарғоналиклар билан бўлган ўйиндаги дуранг натижа тасодиф эканлигини исботлаш ниятида майдонга тушсак, “темирйўлчилар” Намангандан ҳеч бўлмаса,бир очко олиб кетишга интилишади.

Шу ўринда яна бир нарсани таъкидлаб, қўшимча қиламанки, биз ҳар бир ўйинда майдонга ғалаба иштиёқида тушамиз ва бу ниятимизни амалга ошириш учун барча имкониятимизни ишга соламиз. Мухлисларимиздан ҳар хил ўй-хаёлларга бормасдан, бизга ишонишлари, шунингдек, бўлажак баҳсда стадионга кўпроқ ташриф буюриб, жамоамизни бевосита ўйингоҳда муносиб қўллаб-қувватлаб туришларини сўраб қоламан.       

Жамоамиз жорий мавсумда нафақат совриндорлар сафидан жой олиш, балки чемпионлик учун охиригача курашади ва буни амалга ошириш учун биз – футболчилар қўлдан келганича ҳаракат қиламиз", — деди Ашурматов.

“Навбаҳор” ПФК матбуот хизмати.